നമ്മുടെ പ്രവർത്തനങ്ങൾ വിലയിരുത്തുമ്പോൾ വർത്തമാനകാലത്തെ മികവുറ്റതാക്കി ഭാവിയെ പ്രതീക്ഷയോടെ വരവേൽക്കാൻ പര്യാപ്തമായ ഭൂതകാല ചരിത്രം നമുക്കുണ്ട്. ഒരു ഇടവകയുടെ ചരിത്രത്തിൽ ക്രിസ്തീയ ദൗത്യ നിർവഹണമാണ് പരമപ്രധാനം. ഇടവകാംഗങ്ങൾ ശരിയായ ആരാധന ജീവിതം നയിക്കുന്നവരായിരിക്കണം.
ചെങ്ങരൂർ പള്ളി പൂർവികർ പകർന്നുതന്ന വിശ്വാസാചാരങ്ങളിൽ അടിയുറച്ച് ക്രിസ്തീയ ദൗത്യ ബോധത്തോടെ മുന്നേറി എന്നതിന് രണ്ടു പക്ഷമില്ല. ആത്മീയ നിറവുള്ള വൈദികരുടെയും നിസ്വാർത്ഥരായ കൈക്കാരന്മാരും, സെക്രട്ടറിമാരും,പ്രാദേശികമായി പ്രാർത്ഥനയോഗ അടിസ്ഥാനങ്ങളിൽ നിയോഗിക്കപ്പെടുന്ന മാനേജിംഗ് കമ്മിറ്റി അംഗങ്ങളും, ആത്മീയ സംഘടന പ്രതിനിധികളും നിരന്തരം ഇടവകയുടെ ദൈനംദിന കാര്യങ്ങളിൽ ബന്ധം പുലർത്തി വരുന്നു. തന്മൂലം ആത്മീയ വളർച്ചയ്ക്ക് ഒപ്പം സമഗ്ര പുരോഗതിയിലൂടെ മുന്നേറുക ചാരിതാർത്ഥ്യ ജനകമത്ര!
ഇടവകയുടെ പുരോഗതിയെ മികവുറ്റതാക്കുവാൻ മുഴുവൻ അംഗങ്ങളും അതാത് ആത്മീയ പ്രസ്ഥാനങ്ങളിൽ പങ്കാളികളായിട്ടുണ്ട്. നിത്യവും പ്രഭാതത്തിൽ അഞ്ചര മണിക്ക് ഇടവകയുടെ മണിനാദം കേട്ടുണർന്ന് കുടുംബാരാധനയിൽ മുഴുകുവാനും, പ്രദോഷത്തിൽ അഞ്ചര മണിക്ക് ദേവാലയത്തിൽ സന്ധ്യാനമസ്കാരത്തിൽ പങ്കെടുക്കുവാനും ഇടവകാർക്ക് സാധിക്കുന്നു.